從今年「高普考客家行政類取一儕」講起

黃永達

今年高普考客家行政類正錄取1儕，還係台南市要个名額，舊年錄取9个，記得前年有2个，行政院客委會講已經摎桃園縣、台中市、高雄市協調好勢咧，明年會有4个名額，手指伸出來算一下，到明年為止，單淨有16个新力軍進入客家行政系統。馬政府客家政策底肚，單淨設置「客家文化重點發展區」69个鄉鎮(客人佔40%以上)要做个行政工作，就係講一鄉鎮分一儕，總共人員就毋止要69儕。客家文化發展工作千頭萬緒，就係錄取兩倍(138儕)乜毋罅，再過講「客家文化重點發展區」連一个影跡就無，這下剩無8个月，馬蕭客家白皮書中單淨這則「客家重點區」个政策主張就顯然跳票。其實「搶救客家」國政恁緊急要做，火就會燒到褲襠底，佢無要無緊，看起來已經就要宕忒4年咧。

今晡日有資格做「客家文化重點發展區」个69鄉鎮，大部分分佈在桃竹苗、中投、高屏、花蓮，這兜縣市，加上較散庄个其他縣市，大部分也有設有客家局、處、會，這兜縣市級个涉客單位，中央級个客委會，底背恁多个事務官、行政人員，佢兜儕敢毋使有客家行政个專長、資格？算算總共乜要有350儕以上，這係專長、證照、分工个年代，照理講，涉客人員當然要有相當「客人、客文、客事」个知識摎經驗，簡單講，最起碼乜要取得高普考及格个資格，係無，要仰般服務「客家」？

另外一方面，所有其他專長个考科(像人事、金融、會計、建築、土木、電機等等)，除了兩科共同科(國文、行政法及英文)外，高考要考6科專業科、普考要考4專業科，單淨「客家行政科」專長正考兩科客家有關个內容，其他科目像共同科樣仔，連一等重要个「客語」就無考，專業科目个考試，普考等於才考一半、高考才四分之一，請問毋曉摎客庄民眾講客，也知無幾多客庄人文，要仰般做「客家行政」？