校長帶頭做不忠不孝个教育

黃永達

幾日前有三十零個民間社團到教育部要求還分國民使用台灣語文个教育權，某一校長協會會長、也係新北市某一國小校長認為母語係「阿婆个話」，傳承阿婆个話要靠屋家，外背毋使講，又講眼前教學時數滿咧，加添麼介科个教學時數都有困難。嗚呼！有恁樣个校長協會會長，就有恁樣不忠不孝个社會，有恁樣个校長，就有恁樣無教育理念、無思考邏輯个教育政策。

照校長个思考邏輯，若母語單淨係「阿婆个話」，恁樣英、日、西語就係英美人、日人、西班牙人个「阿婆个話」，屋家講就好，做毋得(毋使)在國會、學校、媒體項講，要講話就講外來語，係毋係西班牙、日本个公部門要講英文？美、英國要講華語或者日語？這下个北華語(普通話)係滿漢人300年來在北京大都會區形成个方言，安著madarin，也就係當地「阿婆个話」，恩裡自家阿婆个話毋學，專專要學、要講別人「阿婆个話」，連學校、媒體、政府全講人家阿婆个話？

再講，母語係祖先、歷史留下來个重要資產，更加係子弟學習「語言情感」、「語言運用」、「語言與時空(歷史與社區)連接」最重要个基礎。毋學母語，也就失忒這個基礎，台灣學生个TOEIC英語溝通能力測驗會考輸分日、韓、越、泰、中等國，因為人家个子弟從小到中學、大學到社會，全會使用自家母語祖宗言，連專制中國各地學校个校長、先生、學生也共樣。單淨平平比英語能力來講，這就說明了學、講母語个重要性、功能性。

這位校長對教學時數个看法過較好笑，單淨拿語文課來講，摎台灣大部分社區無關係个北華語加英語佔語文課時數的全部(在一週間約佔了三十點鐘左右)，當然沒有空間給母語時數。事實上，恩裡係講摎這三十點鐘大約平均分給母語、漢文、英文，由近向遠个學習，台灣子弟个語文能力正有救。

嗚呼！不忠(於土地、社區、歷史)不孝(於爺哀、阿公阿婆、阿公婆)个語言教育，無符合學習原理个語言教育幾時休？！