全國國中基測个迷思摎迷失

黃永達

5月20,21兩日个國中基測正考忒，報紙對這擺有北北基基測從全國基測獨立出來，變有兩地區無共樣內容个基測，講係「一國兩制」，又提到北北基連英文就出兜在地个題材，講恁樣對外縣市來「上京赴考」个考生無公平。

筆者認為這兜媒體个講法係一種嚴重个文教迷思摎迷失，第一，基測制度係一致个，參考基測做分發，全國就係恁樣做个，當然毋係「一國兩制」，這係一國一制兩文教區(兩基測內容)；第二，「上京赴考」係自家加選个，無人迫汝做跨區考呀！

筆者認為，分做兩文教區係早就愛恁樣做个，毋單淨愛恁樣分，還應當分做四个或者六个文教區，每一區就愛有佢个在地思考。恩裡做得分兩文教區做開始，再做分較多文教區个改革，各地个學生仔應當愛在在地讀高中，像讀初中(國中)共樣，繼續培養佢在地个情感，恁樣乜正做得達到區域平衡。

全國一國一制一文教區，這係專制化、單一化、簡約化个「大一統」思考，非常保守、封建、懶尸、無文化觀念。台灣雖然無幾大，各地歷史人文地理卻各有佢个特色，分做北中南東四區，或者分像北北基、桃竹苗及中投客語區、中彰雲嘉、南高屏、宜花東、金馬澎等六文教區(基測考區)，考科中像社會(含史地、風俗)當然無話講，連英文、國文、自然，就應當有相當部分係在地特色个考題，連數學應用也做得恁樣做，筆者認為，大約在地(所在地文教區)佔1/4，台灣1/4，亞洲1/4，世界1/4係盡正常个。

恁樣做，等於一半係國內(本地)內容，一半係國外(世界)內容，係講基測引導教學，恩裡个後生子弟才做得先從身邊个事物學習起，正做得學習到教育摎生活內容、社區社會係一體个，再學習到世界个事物，正會有真經个體會。

係講認為恁樣忒麻煩，全國應當一綱一本一考題，該係政府、教育機關个懶尸；係講認為恁樣會剝削忒他區考到台北高中个機會，該係家長、地方先生對大城市學校、明星學校个迷思，幾多社會有成就个人，毋係明星學校出來个；又有幾多一路明星學校讀出來个，毋像人兼無衛生。係講台灣繼續做全國統一教學、統一考題，學生仔讀好麼介「中華文化基本教材」、背熟該自家就講「吾不如老圃」个子曰孟曰，專讀標準教科書基測題、考好試就盡好、盡乖，結果做一个毋識桑麻五穀、家族社區、社會參與的「好學生」、「資優生」，該就毋單淨係教育个大迷思，更加係恩裡子弟个大悲哀、大迷失呀！