「客語教學支援人員」、「客語薪傳師」係麼介東東？

黃永達

教育部先搣一個「客語教學支援人員」，行政院客委會根據客家政策白皮書，又搣一個「客語薪傳師」，前者實施有10年左右，後者實施也有3年咧，到底搣个目標係麼介？後手又愛仰般行？

大家知中小學肚項，華語有「國語教師」、「國文教師」，英語有英文教師，這兩个語言教師係經過嚴格教育嚴格考試出來，教育單位正式頒授教師證書个，這兩種語言全係外來个語言，來台灣个歷史最多60零年。一等悲哀个係，社會都已進入到自由民主个時代，自己國內主要个兩種語言客家語摎福佬語(在台灣發展400年歷史)，還係停留到麼介「教學支援人員」、「薪傳師」个地位，根本無先生(教師)个地位，換句話講，台灣母語還一直分政府看作方言、鄉土語言。

馬政府由這兩个部會做「客語教學支援教學」(十年沒有任何更進步做法)、「客語薪傳教學」，根本係「打屁安狗心」个做法，應付應付民眾个要求定定。政府已經頒布69鄉鎮係客語重點發展區，理該在這兜鄉鎮个中小學、社區教育單位，全面實施客語教學个政策，意思係講，最少乜愛有一半以上个教學場域項使用客語，最少中小學个語言課，愛有1/3客語課(其他係華語、英語)，恁樣形客語教學就愛有正式个客語教師來教，換句話講，客語正會進入主流教學底肚。

恩俚強烈要求，政府為了「牽成客家，繁榮客庄」政策，應當舉辦正式个「客語教師」甄選考試，無論大學語文系、教育系畢業或者已取得教學支援人員、薪傳師者都做得再經過嚴格甄試拿到正式教師資格，進入中小學擔任語言課程个正式師資。
(北四縣腔書寫)

美國綠卡和九二共識

黃永達

恁久社會講儘多有關馬英九个美國綠卡和所謂「九二共識，一中各表」个問題，其餘根本毋使恁費氣講恁多，儘簡單个道理，講分國民聽就做得，民眾毋係戇仔。

到今美國無講馬英九个綠卡失效，單淨講佢个綠卡儘複雜，美國移民局無可能無資料，有綠卡無綠卡一查就知，毋過，筆者想講个係，綠卡有效當然是大問題，台灣總統有美國永久居留權(PR, 就係綠卡)這係世紀大笑話，有申請過綠卡个人對國家忠誠度就有問題，仰般還選總統？還做總統？特別佢兩个妹仔還有美國籍，國家个總統對自家个國家係恁樣个態度，還做得分佢做等總統，這个國家个國民係毋係錯亂忒去咧。

國共兩黨个接觸係1992年辜汪會談開始，從來就毋識聽講有麼介「九二共識：一中各表」，係講汝毋知，單淨看「青天白日旗‧三民主義歌」敢識在中國所統領个所在掛起或者唱起？就知根本無一中各表个餘地，該掠時个相關人士(連蘇起也是)都出面否認咧，該麼介總統還講有「一中各表」？再過講，無个東西強強要講到有，就係有也毋係麼介好東西，會二十年咧，做毋到就好早早豁忒去。

蔡英文講：「九二共識係國共共識，恩俚愛台灣共識」，這句話講都儘好又有力，意思係，就講有麼介九二共識，無經過代表台灣人民个國會來通過，也無經過官方代表个簽署，乜毋係國家層次个共識，佢根本係國共兩黨个共識，關恩俚國民麼介事？恩俚愛个當然係台灣人民个共識，台灣人民个共識係麼介，用公民投票就問得出來咧呀，做承勞个政府係講無頭腦想，向做頭家个人民問一聲總做得。

馬英九講花嘹講慣咧，選舉講花嘹，有个講無，無个講有，滿奈係講花嘹，佢所帶領个執行團隊，又乜常透講花嘹，講花嘹的政府，對自家國家土地人民無忠誠个團隊，做頭家个人民好摎佢換下來咧！
(北四縣腔書寫)