總統府發言人个發言

黃永達

五月二十馬就職總統三週年該日，南部各縣市(屏、高、南、嘉、雲)首長聯合發表聲明，馬總統在南台灣个競選支票，較大項个差毋多全跳票，無麼介實現个政績。總統府發言人范姜泰基講，希望毋好分南北。恩裡來看，政府有南北大細目無，先莫去論佢，單淨有關南台灣施政个政見看等就無做到，有个連影跡就無，這係事實，顛倒政府續來講人分南北，人講東，佢講西，人講南，佢講南北，係毋係馬英九又會講再分佢做四年，佢就會做到？

一个零月前，政府發表范姜泰基做總統府發言人个時節，有媒體問佢，身為客家子弟，落去總統府做發言人有麼介看法，佢講，盡好呀！客人因為客家子弟做發言人做得提高能見度呀！問題係，單淨客人做總統府个官就做得提高客人地位，該儘多人喊佢「伯公」、「客家大老」个前國民黨黨主席，做過台北市長、內政部部長、總統府秘書長，佢有提高客人个地位無？除了客家社團場合外，佢敢有在麼介公開場所講客、講自家个母語祖宗言？有恁樣个地位，在公領域公部門下擺講客，對提升客人、客話能見度定著有儘大个功效，較贏大家拼到半生死，佢毋講就毋講。

人一聽到范姜發言人，黏皮就知係新屋客人，陶渭范姜子弟，係講做得藉著發言人个位置，下擺乜來用海陸客話(范姜人个母語祖宗言)來發言，講總統、總統府个公共事務看法(橫直也有新聞稿、華文字幕，再講閩客原華早就並列國家語言咧)，恁樣正多少對提升「客家」地位、能見度有兜效果！另外，用共樣係國家語言个客話來發言，用在台灣歷史中流通比華語久加兩百零年个客語來發言，恁樣敢會過頭？恩裡建議，先做到這，正來講別項吶！(以上北四縣客話)