[中華台北]係麼介水粄？ROC, CT又係麼介水粄？

黃永達

五月中仔，我國衛生署長邱文達(客籍)率領代表團用觀察員个身份參加WHO年會，這个世界衛生組織摎年會關係著全世界人類个健康衛生，當然係世界肚項盡重要个組織會議，其中成員全係代表團，代表一个國家參加。
今年，WHO續用[中國台灣省]來稱呼台灣，分管立委(客籍)掀出來，幾時開始台灣名又變別人國家个一省咧？邱署長个座位名牌安著「Chinese Taipei」，政府講恁樣還做得接受，Chinese Taipei係麼介水粄？中國人(華人)个台北，這敢係國名？Chinese 个漢譯係中國个、中國人、支那人、中文，恩裡政府講係「中華台北」，筆者從來就毋識看到 “Chinese”安著 “中華”，歐洲美洲國家个人根本毋知[中華台北]係麼介東西，筆者摎盡多國人乜毋知該係麼介水粄？

17年前，隨團做公務去到約旦國，簽備忘錄个時節，約方起草稱呼我方為Taiwanese team(台灣團)，駐約代表(也係客籍)硬愛改做「Chinese team」，當時筆者就講Taiwanese team 較著也較實際，恩裡團單淨做得代表台灣定定呀！道理儘明。最尾，還係用該「Chinese team(支那團)」名，筆者試到盡悲哀。

逐擺筆者看到麼介「中華台北」，就歸身仔孽屑，本成看等恩裡个運動選手參加國際比賽，想愛好好來看比賽，摎恩裡國家代表隊加油，一看到刺有不搭不膝个[Chinese Taipei, 或CT](毋係台灣，也毋係ROC)運動衫，也係國人、運動記者跟等喊「中華隊」(自家就毋喊「台灣隊」)，就一下仔變到儘懶頭了，哀哉！「中華隊」又係麼介水粄？明明係來自台灣个「台灣隊」，還愛騙人講係「中華隊」、「中華台北隊」、「CT」。筆者關忒電視，心肝當霍囂！無愛看總做得！

去天西恁遠个日內瓦，WHO宣達團用「中華民國(加註台灣)」護照(這奈係台灣護照)，分大會秘書處拒絕落去旁聽席，講用別國護照就做得，這就明白表示無「中華民國」這个國家，「中華台北」又毋係獨立國家的國名，發照國名又毋係寫「中華台北Chinese Taipei」，毋係一个國家个護照，靠麼介愛甘人承認汝个身份？
「中華台北」係麼介水粄？「中華民國」早就無人喊了，該又係麼介水粄？連政府自家對外就毋喊了，還愛發中華民國護照分國民？恩裡選舉納稅組織个政府分恩裡恁錯亂、恁衰消、恁無尊嚴个日仔，這又係麼介水粄政府？

恩裡國家个名安著台灣，台灣係獨立自主个國家，恩裡愛拿「台灣國護照」，頂高無麼介ROC、CT等阿哩阿雜个東西，恩裡个頭腦正會清，恩裡个尊嚴正會有人尊重，別國人正一看就知汝係哪位人、麼介人。無定著該位WHO官員講个「汝拿別國个護照就做得落去」，該「別國」就係「台灣國」喔！